Rev 13 | BEF | STEP | Nohigo nani bu golago bunaga hege nagamiluguti ya'ma luba nasana akafu yagakafa mone ti'ehina. Ai ya'ma komu'a 10 to lataha'a ya'ma 7 to lataha'a minanalo minanalo ya'ma enigihiti bomagihi kakili ya'ma mino'ehina. To lataha'alo moneko moneko gi'a ya'ma Hu'mamofihi ka'a li sibi saba huto mino'ehina.

Revelation of John 13

Luba yagakafa loemale'ititihi ka'a

1 Nohigo nani bu golago bunaga hege nagamiluguti ya'ma luba nasana akafu yagakafa mone ti'ehina. Ai ya'ma komu'a 10 to lataha'a ya'ma 7 to lataha'a minanalo minanalo ya'ma enigihiti bomagihi kakili ya'ma mino'ehina. To lataha'alo moneko moneko gi'a ya'ma Hu'mamofihi ka'a li sibi saba huto mino'ehina. 2 Ana akafu yagakafa bu go'ohuna ai babeyafa'a ya'ma kelegiyabo sipi'a lolo huto yaha'a sipina ya'ma bea kalamofihi gigusa'a suhi huto to baga'a laeoni luba kalamofihi baga'a legi huto mino'ehina. To hagulu osifa'i yamofihi ai'a amuya'a to ai'a sipi kefa hisa to ai'a sipi bo lolo huto kaba hulatana hiti ya'ma emi'ehina. 3 Akafu yagakafamofihi lataha'a mone'i keye lu fili'ahanaguti aku'i ye koto bati higo noto noto bona'magi asaga'i enali be gelete yege filete lubana hiti akafu yagakafamofihi mege'i melete bi'ahana. 4 Ya nehite hagulu osifa'mofihi kibina bo'a lolo huto minolata amuya emi'ehinamo ni'igi asaga bona'magi lite keke bake lite hagulu osifa'mofihi ya'ma enalahupa fite lipi emi'ahana. Ya nehite akafu yagakafa ana hite le'mo sipi lolo nehite lipi emite ma lite li'ahana: Akafu yagakafa mone'i ai suhi huto menohibe. To mone kiyi'afu luba li huto hilina ni'ibe?

5 Ya lite lilago enugufa lelite titi nehanamofihi ka'a to Hu'mamofihi le'mo sibina hu etalibe luto bagaguti lu eto'ehina. Hu'mau kaga lu laga mehu'ehigo foya'amofihi ya'ma ikahi 42 yamofihi komopa'agu lito metoga kaba hu etoto minalibe luto kana'a molo emi'ehina. 6 To ya hu'ehina'mu Hu'mau ai'a ni'ina gi'a ni'ina to minolata nohina hepa'a ni'ina enali kokulumagu minelata nehana'amagihi hiti hapi fito lu sibina sabana huto mino'ehina. 7 To Hu'mamofihi bona'a luba epinogo enebe ligilibe luto keheli emigo ya suhi huto mino'ehina. To ya'ma Hu'mau lu laga mehu'ehigo akafu yagakafa noto noto bona'i enugufa fato fato'i to naga'i fato fato'i to ka'ani ana huto fato fato'i to melugu bona'i fato fato'i enali'i ai sipi bo'ani lolo huto minalibe luto kaba huse'na'a emito mino'ehina. 8 To melugu bona'i asaga'i enali enalapusa fi emi'ahana keke bake li etalabe. To luga'a enigi'ani ya'ma sipisipi nala'a he fili'ahana ai ya'ma enemeha'a minoba minoba nehana bona'magihi enigi'ani koyo'ehina bukugu koyapa'i me'i huto mehu'ehina kanalo fayahi koyoto molo'ehina enali'anigo ya'ma akafu yagakafa ya'ma ya suhi mehi etalana'mu yabe.

9 Lenegekesa hokolo hu'ehinamagita ya'ma keheliya ite kehelilo. 10 Luga'amagi enali naga nonugu minalabe luto lu'ehinamo ya'ma minalabe. Moneuba ai emita'i yatamatu bo mone ho fililenogomo ana hite yatama emitatu ana bo ho fililabe. Hu'mamofihi nona'a pa sose bona'magi ana yupahi ya'ma li hetofa hite keheli amuya meleteba minalafa.

11 To me'i komopa'aguti akafu yagakafa mone hiti tigo bu go'ohuna. Ai sipisipi nala'a ya suhi huto latahaloti komu'a loemo tito mino'ehina. Nogo'a ya'ma hagulu osifa'mofihi ya suhi huto mino'ehina. 12 To akafu yagakafa aliha'a ya'ma kohe toto akafu yagakafamofihi gobisalo amuya'amofihi foya'a lito mino'ehina. Ya nohuto asaga melugu bona'i lu epigo kohe toto akafu yagakafamofihi lataha'a mone keye lu fili'ahanaguti aku'i ye koto bati higo ho ti'ehina ai'i ya'ma lipite agoya hi emite neminabe. 13 To akafu yagakafa alihi hutu hu'ehina ai fato suhi huto topa hose nasana sipi lilata nohibe. Ya nohuto mone ma huto li'ehina. Ai melugu bona'i asaga'magi be ge'ahago kokulumaguti logo ya'ma metoga limilata nohibe. 14 Hu'mau lu laga mehu'ehigo topa hose nasana amuya ya suhi huto lolo hilibe luto keheli emigo kohe toto akafu yagakafa ti'ehina ai'a bulo ya'ma topa hose nasana lolo huto melugu bona'i komopa'ani fibe taga hube huto mino'ehina. Ya nohuto metoga bona'i lu epigo akafu yagakafamofihi afeha'aga ema emitatu laga hago fili'ehina ya suhi lolo huloto ho ti'ehinamofihi fayaha'a legita lolo hilo ligo ya lolo hite anatoga enalapusa fi emilabe. 15 Hu'mau lu laga mehu'ehigo aliha'a akafu yagakafauba kohe to'ehina akafu'na fayaha'a legita lolo hi'ahanamofihi sikalafu hu emigo le'mo ho tito kaga luse nohigo bona'magi enali enalapusa fi emite minelata nehabe. To luga'a agoya meemisemagihi enoho fililata nohibe. 16 To afafu yagakafa'uba tite nehana'a to limite nehana'a, fe'noha'ani lina'a to enumuhi meni'ina'a enigihiti bo to kele kele'ani ya'ma bona'i asaga'magi ya'ma ai linogo enayahi lamaga'aga ya'ma to enogobisalo omiha'ani mone keye su helata nehabe. 17 To akafu yagakafa ya suhi huto omihi ya'ma gi'amofihi fayahifi to hapa'amofihi napa'a mekeheli'ahana'a enali ana'ina mina filata nasana'mu kapo fi hekini le epelelata nehabe.

18 Ya'ma li gehesamofihi hapa'a sa hite keheliya ilabe. Bo moneuba ekesa keheliba keheliba huto komopa'agu keheli'ehinogomo akafu'na ya suhi huto napa'amofihi hapa'a ya'ma li huto hite kehelilabe. Napa'a ya'ma bo mone'mofihi gi'amofihi napa'a ya'ma 666 ya legi huto ni'inamo ni'ibe.